18 чэрвеня ў Жабінкаўскай раёнай бібліятэцы адбылася прэзентацыя новай літаратурнай працы пісьменніка Расціслава Бензярука – кнігі гумару і сатыры «Гама для дваіх». Ва ўтульнай зале сабраліся аматары творчасці, сябры, родныя і блізкія пісьменніка, каб падзяліць з ім радасць ад важнай падзеі ў яго творчым лёсе – з’яўлення новай кнігі.
Чаму менавіта «Гама для дваіх»? Расціслаў Мацвеевіч расказаў пра сваю натхняльніцу – дзіцячую песеньку «До-рэ-мі-фа-соль-ля-сі», падзяліўся, як да яго прыйшла ідэя гумарыстычнага зборніка, адзначыў, што кожны верш і гумарэска пісаліся з задавальненнем, таму ўсе творы для яго – любімыя.
Першым слова ўзяў журналіст, гісторык, прадаўжальнік пісьменніцкай дынастыі Анатоль Расціслававіч Бензярук. Сын адзначыў, што для яго гонар – мець такога бацьку, расказаў некальці цікавых момантаў з сумеснай творчай працы і пажадаў Расціславу Мацвеевічу і надалей упрыгожваць літаратурны небасхіх сваім талентам.
2024 год асаблівы для творчай дынастыі Бензерукоў, год, у якім адзначылі два годных юбілеі — 55 і 80 гадоў – і сын, і бацька.
Галоўная захавальніца «сямейнага гадзінніка», Вольга Рыгораўна Бензярук раскрыла прысутным сакрэт: як гэта – быць жонкай і маці творчых людзей, ствараць у хаце ўтульную і натхняльную атмасферу. Вольга Рыгораўна прадэкламавала любімы верш, напісаны мужам – «Тры свечкі».
Ганаровы госць і калега, старшыня Брэсцкага аддзялення Беларускага саюза пісьменнікаў Таццяна Дземідовіч падзялілася ўражаннямі ад кнігі «Гама для дваіх», якая ёй не проста прыйшлася даспадобы як чытачу, але і выклікала шмат цікавых думак і разважанняў.
Член Саюза пісьменнікаў Беларусі, кіраўнік Кобрынскага літаратурнага клуба «Паэтыка» Наталля Кандрашук спецыяльна для мерапрыемства напісала верш, у якім «схавала» адзінаццаць твораў Расціслава Бензярука. Госці падцвердзілі званне знаўцаў творчасці, з лёгкасцю адшукаўшы ўсе назвы. Паэтка Зінаіда Дудзюк, павіншаваўшы Расціслава Мацвеевіча з выхадам новай кнігі, падаравала сабрату па творчасцi свой новы зборнік. Загадчыца аддзела Брэсцкай цэнтральная гарадской бібліятэкі імя А. С. Пушкіна Ірына Фаміна прысвяціла Расціславу Мацвеевічу свой новы верш. А чытач раённай бібліятэкі Уладзімір Лапус выказаў Расціславу Мацвеевічу глыбокую ўдзячнасць за яго творчасць. «Расціслаў Мацвеевіч – яскравы прыклад не толькі таленавітага, але і сумленнага і працавітага чалавека, яго жыццёвы і творчы шлях могуць служыць узорам для пераймання будучымі пакаленнямі», — падкрэсліў Уладзімір Ханонавіч.
Яркі прадстаўнік гарадской культуры Жабінкі, пастаянны ўдзельнік літаратурна-музычных мерапрыемстваў, гітарыст Аляксандр Рыб’якоў па асабістай просьбе Анатоля Расціслававіча, выступіў у ролі «раяля ў кустах». Гітарыст выканаў для прысутных песню Анатоля Вярцінскага.
«Творы Расціслава Мацвеевіча прасякнуты дабрынёй, цяплом, імкненнем зрабіць свет яшчэ больш дасканалым. Ён валодае дарам бачыць нечаканае ў звыклым, простае ў складаным, у малым – вялікае і самае галоўнае, паказваць гэты свет ва ўсіх яго фарбах», — падвяла вынік гутарцы вядучая.
Узяўшы слова ў адказ, Расціслаў Мацвеевіч падзякаваў за ўвагу, падзяліўся творчымі планамі, якіх, на радасць гасцям, у пісьменніка яшчэ шмат.
Людзі маюць прывілею:
Юбілей – за юбілеем,
Каб пад чарку ці пад грошы
Зноў пачуць, які харошы,
Што дабіўся сам нямала –
Ёсць і сала, і да сала…
Р. Бензярук “Нам даюцца юбілеі”
Як зазначыла вядучая, для гасцей прэзентацыі Анатоль Бензярук таксама падрыхтаваў «сала і да сала». Пасля афіцыйнай часткі мерапрыемства гасцей чакаў салодкі стол, на якім сябры і блізкія Расціслава Мацвеевіча Бензярука з задавальненнем пагутарылі ў нефармальнай абстаноўцы.
Марыя ПРАТАСЮК
Хотите оставить комментарий? Пожалуйста, авторизуйтесь.