12 кастрычніка ў Брэсце пройдзе традыцыйны восеньскі канцэрт якаснай музыкі «Меn’s fest», які адбудзецца ў клубе «Сфера». Ад ініцыятывы аматараў добрай беларускай музыкі заўсёды чакаеш нечага экстравагантнага. Вось і сёлета прома-суполка Змітра Назарава абвясціла аб прынцыпова новай канцэпцыі чарговага фэсту. У гэтым годзе ён пройдзе ў больш «лайтавым» фармаце. І гэта не выпадкова – арганізатары паставілі мэту правесці мерапрыемства, разлічанае на сямейнае наведванне.
– Мне б хацелася заўважыць, што гэта не тая папса, што льецца на нас з тэлеэкранаў, – заўважыў Зміцер Назараў. – Музыку накшталт «два притопа, два прихлопа» вы на «Меn’s fest» не пачуеце. Але калі жадаеце пачуць якасную беларускамоўную музыку, то наша мерапрыемства – гэта тое, што трэба.
Хэдлайнерам канцэрта стане даволі вядомы калектыў «Akute» з Магілёва. Музыкі ўжо каторы год збіраюць залы не толькі на Бацькаўшчыне, але і па-за межамі Беларусі. На канцэрт у Брэсце, што меўся быць некалькі месяцаў таму, квіткі былі прададзены за два тыдні да мерапрыемства. І вось у брастаўчан і гасцей горада ёсць яшчэ адзін шанс пачуць беларускамоўных выканаўцаў.
Эмацыянальна-экспрэсіўная Паліна Рэспубліка без сумненняў падорыць гораду часцінку свайго душэўнага цяпла. І дуэт з украінскім удзельнікам «Меn’s fest» гуртом «Фіялет» абяцае быць даволі цікавым. Паліна і вакаліст Сяргей «Колас» Мартынюк выканаюць песню на беларускай і ўкраінскай мовах. А калектыў з Беластока «Ilo & friends» проста прадэманструе, што беларускую мову можна любіць і ўжываць не толькі на Беларусі. Аматары сведчаць: калі ўпершыню слухаеш Ілону з Беластока, па целе ідуць дрыжыкі. Брэст на фэсце прадставіць калектыў «Pirouette».
Цікава, адкуль паходзіць назва «Меn’s fest», калі найчасцей сярод выканаўцаў заўважаеш дзяўчат?
– Усё проста. У 2009 годзе ў Мінску пад такой назвай прайшоў канцэрт – вяртанне гурта «Sciana», – растлумачыў Зміцер Назараў. – Афіша была стылізавана пад вокладку мужчынскага «глянцу» «Men’s Health». Канцэрт адбыўся 23 лютага, а напярэдадні праходзіць Дзень роднай мовы. Вядучы Ілля Маліноўскі нават жартаваў – якое ж са свят нам азначаць? У выніку вырашылі азначыць Дзень абаронцаў роднай мовы. У хуткім часе, калі прыйшла ідэя фестывалю, я ўспомніў добрую назву і захаваў яе.
З кожным годам праводзіць «Men’s fest» усё цяжэй. На жаль, беларускамоўных калектываў становіцца ўсё менш. А для арганізатараў наяўнаць беларускіх кампазіцый ў рэпертуары – прынцыповая пазіцыя.
– Нас нават вінавацілі ў прадузятасці. Але ж беларуская мова з самага пачатку была ўмовай удзелу ў фестывалі. Ён ладзіцца сумесна з грамадскай суполкай «Будзьма», адной з мэт каторай з’яўляецца захаванне беларускай культуры. А якая культура без мовы? Мы адмовіліся праводзіць фестываль у фармаце конкурсу. Мне значна цікавей запрасіць добрыя калектывы, каб кожны мог упэўніцца, что беларуская музыка жывая. Таму наш фэст – гэта ў першую чаргу свята добрай музыкі, добрага настрою і выдатных выканаўцаў.
Між іншым, «Меn’s fest» гэтага года можа рэпрэзентаваць музычнай супольнасці новы калектыў. У сацыяльных сетках ідзе актыўнае галасаванне на вылучэнне лепшых басіста, гітарыста і барабаншчыка. У фінальны тур прайшлі па тры музыканты. І на канцэрце найлепшыя з найлепшых будуць запрошаны на сцэну, каб прыняць удзел у джэм-сейшэне. Хто ведае, мажліва, вынікам гэтай імправізацыі стане нараджэнне новага калектыву. Сёння вядома, што на тытул лепшага барабаншчыка прэтэндуюць Мікалай Сямітка («Pirouette»), Платон Мядзведзеў («TerraCod») і Аляксей Кузняцоў («Sciana»). Тройка найлепшых гітарыстаў складаецца з Юрыя Карагоды («Pirouette»), Аляксандра Зданевіча («The Lover’s Gun») і Вадзіма Падскачука (сесіённы гітарыст «Дай Дарогу!»), а сярод бас-гітарыстаў на тытул найлепшага прэтэндуюць Алесь Брыштэн («Crusade»), Стас Сюзеў («Wolfshade») і Андрэй Пасохін.
У будучым арганізатары плануюць ператварыць «Меn’s fest» у вялікі оўпэн-эйр. Дзеля таго, каб зацікавіць замежных гасцей, для гледачоў з Украіны і Польшчы прадугледжаны значныя скідкі на білеты. Больш таго, польскія аматары музыкі ўжо ў гэтым годзе для наведвання канцэрта могуць атрымаць беларускую візу бясплатна. На жаль, усе планы ўпіраюцца ў грошы. Але гэта размова іншага ўзроўню. Пакуль што мы можам проста паслухаць добрую музыку для душы.
Видео Дмитрия Курашова.
