У Берасці доўжыцца «Рух зямлі». Акцыя абласнога грамадска-культурнага цэнтра, прынамсі, яго аддзела традыцыйнай культуры, стартавала пяць гадоў таму і фінішаваць не збіраецца. Суботнім вечарам на «Вычорках» назіраўся сапраўдны аншлаг. Палешукі з Іванаўшчыны, госці з польскага Падляшша, «вяскоўцы» з Мінска… Грымелі бубны і заліваліся скрыпкі, танчылі, расказвалі байкі, частаваліся.
Фальклорны гурт «Залядынская гамонка» з Іванаўшчыны прыбыў у абласны цэнтр, што называецца, з карабля на баль. Сёлета калектыву прысвоена высокае званне народнага. І вось ужо не паскупіліся ўдзельнікі на майстэрства і сапраўдную народнасць, якую наўрад ці магчыма набыць толькі на сцэне. Баба Маруся (Марыя Іванаўна Цыральчук) у 74 гады мае такі запал апавядальніка, што хопіць на дзесятак маладых. Гісторыі з жыцця вёскі і вяскоўцаў без смеху слухаць нельга. А ўжо спяваць іванаўцы вартыя, не сакрэт!
Кіраўнік калектыва, дырэктар Залядынскага СДК Ірына Кацко прыйшла на свята з «чароўным» куфэркам. А ў ім усяго багата! Але найперш жанчына раздала гледачам маткі з ніткамі, каб… дапамаглі іх зматаць у клубкі. І вось ужо не кожны гарадскі жыхар ведаў, што рабіць з гэтым дабром… Тут жа былі арганізаваны іншыя конкурсы. Каларыту дадаў цёмнаскуры нігерыйскі студэнт. Артысты тут жа запрымецілі госця, «які прыехаў на канцэрт аж з Афрыкі», запрасілі да сябе, і, як маглі, навучалі танцам.
Не мінаюць магчымасці выступіць у Берасці госці з польскага Падляшша. Аб?яднанне «Музей малой Бацькаўшчыны ў Студзіводах» начале са старшынёй Дарафеем Фіёнікам – асяродак зберажэння беларускай культуры за Бугам. Прычым кожны раз энтузіяст прывозіць ўсё больш моладзі. З маленства дзеткі навучаюцца беларускім спевам, граюць на народных інструментах. Ды і за танцы зусім не варта хвалявацца. «Лысага», кракавяк ці «пад іспань» вучні малодшых класаў умеюць паказаць, а дакладней, дадуць фору іншым дарослым. Вось вам і «заграница». А на гэты раз выступіў не толькі фальклорны гурт «Жэмэрва», але і іх старэйшыя сябры – гурт «Пудляшанкі», у які ўваходзяць жанчыны паважанага ўзросту.
Рэпертуар калектываў не прысвячаўся адзінай тэме. Таму разнастайнасць песень па-добраму здзіўляла. Палескія «Вычоркы» былі багатымі па зместу, як само народнае жыццё. Адрозніваўся ад
іншых выкананнем песень, рэпертуарам ды і вопраткай калектыў «Старое сяло» з
Мінска. Маладыя людзі часта бываюць у фальклорных экспедыцыях, запісваюць песні
ў розных рэгіёнах Беларусі. На гэты раз берасцейцам прадставілі тыя, што былі
адабраны на Піншчыне і Століншчыне. Добрая манера выканання, гармонікі, лыжкі,
і вось ужо ўся зала падтанцоўвала пад мясцовыя частушкі.
Калектыў «Старое сяло» з Мінска прадставіў берасцейцам песні,
што былі адабраны у фальклорных экспедыцыях па Піншчыне і Століншчыне.
Фіналам стала этнадыскатэка, а па-просту – народныя танцы. Гледачам прапанавалі спусціцца на першы паверх з-за недахопу месца. У народных касцюмах выдзяляліся ў натоўпе дзве дзяўчыны… Аказалася, мінчанка Ганна спецыяльна прыехала «хапіць» у Брэст старадаўніх танцаў, стаміўшыся ад гламурнага тлуму сталічных начных клубаў. А яе сяброўка з Берасця Ангеліна толькі падтрымала ініцыятыву. Няхай не ўсё атрымлівалася адразу, але майстар-клас дакладна пайшоў на карысць.
Загадчыца аддзела традыцыйнай культуры АГКЦ Ларыса Быцко ў размове з журналістам «Вячэрняга Брэста» выказала надзею, што «Рух зямлі» у абласным цэнтры не спыніцца. Ва ўсякім выпадку ў бліжэйшы год. Наадварот, арганізатары плануюць зрабіць праект больш шырокім і разнастайным. Па словах субяседніцы, бывае сорамна, калі літоўцы, палякі ці расіяне пры бяседзе могуць лёгка выканаць свае нацыянальныя песні ці прадэманстраваць танцы, а вось беларусы, на жаль, не заўсёды валодаюць гэтым майстэрствам. Няблага, калі праект дапаможа выправіць такі промах.
Хотите оставить комментарий? Пожалуйста, авторизуйтесь.